قاعد بضرب الشاى بلبن و بجهز موضوع عن الكيس الزلاى لسباحين المونو هوب الاقى مسدج جيالى بتقولى ممكن تتكلم عن التعب بتاع التدريب و ازاى نعرف التدريب زيادة او لا هوب افتكرت شكل العيال المفرهدين فى البطولة ولاد صغننة شايلين هموم جبال كان عندهم 60 سنه فقولت دا وقتو و عارف ان الموضوع هيزعل مدربين كتير لاكن مبدهاش بقا
ما هو التدريب الزائد ؟
ببسطاطة هو فشل فى التكيف بينتج عنه خلل فى الجهاز العصبى و المناعى و تراجع اداء السباح . واحد هيقولى مفهمتش حاجه
بص يا سيدى التدريب بيتكون من 3 مكونات الشدة و الحجم و فترات الراحة البينية الشدة و دى بتعبر عن صعوبة التتدريب و الحجم بتعبر عندنا فى السباحة عن عدد الكيلو مترات الى عامها الولد و الراحة دا الى بياخدها بين المجموعات فاهم لحد دلوقتى ركز بقا معايا فى الى جاى
اى فشل بين ال3 مكونات دول بيخرب الدنيا يعنى لو زودت الشدة و قللت الراحة الدنيا تبوظ
لو زودت الحجم و عليت الشدة الدنيا تبوظ طب لو كلو كويس و كلو متظبط و التغذية مش مظبوطة دا يبوظ التكيف طيب لو كل دا مظبوط و الراحة فى البيت مش مظبوطة الدنيا تبوظ لو السباح بيستخدم الموبيل او الاجهزة الالكترونية كتير او بيسهر الدنيا تبوظ لو السباح فى الجيم بيشيل اوزان كبيرة اكبر من طاقتة او بيعوم وحدات كبيرة او بيتفزلك و يعوم من ورا مدربو عشان يحسن اكتر الدنيا تبوظ .
بختصار عشان تتلافى الحالة دى يجب العمل بحرفية بين مدرب المية و الفتنس و الاهل فى البيت و السباح و العمل كمنظومة متكاملة
علامات التدريب الزائد اية ؟
التعب المستمر حتى فى وقت الراحة
عدم القدرة على تحقيق ارقامك فى السباحة
الارق و صعوبة الدخول فى النوم
الاصابة المستمرة بالامراض و نزلات البرد و الاصابات
تقلب المزاج و سرعة الغضب و البكاء
عدم القدرة على اداء الواجبات الدراسية
العدوانية
يا ترى فى اختبارات بتبين ان ابنى تعرض لتدريب زايد ؟
اه يا كباتن فى نوعين من الاختبارات اختبارات سهل اى حد يعملها و اختبارت بتتعمل فى المعمل .
نبدا بالاول
فى عالم فنلندي اسمو روسكو (Rusko ( عمل اختباراً بسيطاً للكشف عن بداية ظهور أعـراض فرط التدريب عن طريق النبض
ركز عشان اقولك هنعمل الاختبار ازاى :
*هنام على ضهرنا لمدة 10 دقائق و نقيس النبض .
* بعد انتهاء ال10 دقائق هيقف السباح و يقيس النبض بعد 15 ثانيه و بعد 90 و بعد 120 ثانية و هنسجل ال 3 ارقام .
هنعمل الكلام دا يوميا لو النبض زاد عن 10 نبضات فى ال القياسات دى
يدق ناقوس الخطر ,,,,,,,,,,,,,
طبعا الكورتيزول بيكون عالى ونـورإبينفرين بيكون عالى التستيرون بيكون قليل كل دا بيتعملو قياسات معملية و الدكتور مع اخصائى فسيولوجيا الرياضة هم الى بيقول فعلا اذا كان في over training او لا
**جميع حقوق النشر محفوظة لنا فقط و غير مسموح بالنسخ و الا ستعرض نفسك للمساءلة
