كارثة الانقطاع عن التدريب

ال Detraining او بالعربى الانقطاع عن التدريب

مرض مزمن بتعانى منو الرياضة و الرياضيين فى مصر يمكن احد اهم أسباب فشل صناعة البطل فى مصر خلينا نقول بي انك عشان تعمل بطل دا بيحتاج انك تقضى شهور و سنين متوسطها ١٢ سنة يعنى ١٤٤ شهر يعنى ٦٢٤ اسبوع و ٤٣٢٠ يوم 13,140 ساعة حسب نوع النشاط التخصصي
الانقطاع لمدة ٣ شهور للاعبي المستويات العليا بتفقد الاعب ٥٠٪‏ من القدرة الهوائية
الانقطاع لمدة ٨ أسابيع للاعبى المستويات المنخفضة يفقد الاعب كل مميزات اللياقة الاكسوجينية
طيب المشكلة دى فى مصر مين يجروء و يقول انتا عندنا مشكلة الانقطاع عن التدريب ههه عدو كدا معايا ١- اول الدراسة بنظبط الدرس
٢-امتحانات الميد ترم و قبلها
٣- امتحانات نص السنة و قبلها
٤- اجازة نص السنة و ضغط مذاكرة الولاد فى الدكتوراة بتاعت سنة ٣ و ٦ و ٣ إعدادى و ٣ سنين ثانوي
٥- هنرجع تانى نظبط الدروس طبعا فلازم انقطاع
٦ - ميد ترم تانى و قبلو
٧ - اخر السنة ولازم نعوض الترم الاول و بابا الولاد هيطلقنى او مامة الولاد مش مقتنعة بالتمرين و عايزاهم يركزو فى المذاكرة
٨ - و اخر اجازة ودى بتبقى مركبة يعنى شوية المصيف المقدس ودا مبيقلش عن اسبوع و بيوصل ل ٣ شهور احيانا

مش هكلمو عن عيد كبير و عيد صغير و رمضان و العزومات و عيد القيامة و ما الى ذلك من أعياد دينية الى لو قولتلكو الولاد تتمرن فيها هتتهمونى بالزندقة و أنى واحد من الخوارج الى بيتمرنو و بيمرنو فى المناسبات الدينية

طيب نكلم بشكل علمى اية التغيرات الفسيولوجية الى بتحصل للجسم نتيجة الانقطاع عن التدريب.

تغيرات بتحصل الدم :
•نقصان حجم بلازما الدم
•نقصان الكرات الحمراء
•نقصان عدد الصفائح الدموية
• نقصان فى حجم الدم ككل

تغيرات بتحصل للقلب :
• نقصان حجم القلب بعد حدوث ظاهرة التضخم الصحى الى بيقولو عليها ظاهرة القلب الرياضى
•نقصان حجم الضربة فى الراحة
• زيادة عدد نبضات القلب
تغيرات بتحصل للرئتين :
•نقصان الحجم الرئوى
• زيادة معدل التنفس الى هو عدد مرات التنفس فى الدقيقة
• نقصان ال vo2max

تغيرات بتحصل للأوعية الدموية :
•انخفاض درجة المطاطية
• ارتفاع الضغط الشرياني
تغيرات بتحصل للعضلات و العظام :
• كثافة العضم بتقل بعد ما كانت اتحسنت
• انتكاس الحجم العضلى

بعد كل الغياب و التأثيرات السلبية الى بتساهمو أنها تحصل للاعب تيجو ترمو اللوم على اللعيب و المدرب و تقول ابنى مبقاش بطل لية او انا عايز ابنى يعلق ميدالية بقا او بقالى ٧ سنين شغال و انتا واخد نصهم إجازات يا ترى هتغيرو ثقافتكو ؟ ياترى يا أندية و يا مدربين هتدو اللعيبة اجازة طويلة بعد البطولات و تهدو الى بتعملوة طول الموسم ولا هتتبعو التطور طويل المدى لصناعة الابطال سؤال يحتاج لإجابة
حبيبنا الى بيسرقونى من فضلك شير المقال فقط لانى اخدت وقت كبير دراسة و تلخيص و شكرًا
اخيرا أحب اقولكو شيرو و علمو الناس و هاتو ناس تشير و لو عزت تسال كرمش خمسة جنية فى الانبوكس و هنرد عليك 😂😂